Samarittarnir hjá Reyða Krossi 25 ár á baki
![30Aug24 B3A6076](/media/3mofahwd/30aug24_b3a6076.jpg?width=750&quality=85&format=jpg)
Hátíðarhald var í hølunum hjá Reyða Krossi í gjár, tá ið Samarittarnir hjá hjálparfelagsskapinum kundu hátíðarhalda, at tey hava verið virkin til alskyns tiltøk í Føroyum í 25 ár.
Heðin Mortensen, borgarstjóri, bar fram hesa heilsan og tøkk frá Tòrshavnar kommunu til samarittarnar hjá Reyða Krossi:
Góðan dagin øll somul.
Hugaligt at vera við her í dag, nú samarittarnir hjá Reyða Krossi fylla 25 ár.
Tit byrjaðu við at vera til staðar á altjóða dystum í Føroyum í hálvfemsunum.
Nú 25 ár seinni er neyvan eitt stórt tiltak í Føroyum, har samarittarnir hjá Reyða Krossi ikki eru til staðar.
Tórshavnar kommuna hevur nógv samstarv við samarittarnir, og vit kunnu spyrja okkum sjálvi, hvat er ein Ólavsøka í dag uttan samarittar.
Tit eru eisini til staðar, tá kommunan skipar fyri øðrum stórum tiltøkum, sum tá jólatræið á Vaglinum verður tendrað, og tá jólaskipið kemur á Havnina. Og tað skulu tit hava stóra takk fyri.
Við reyðu búnunum hjá tykkum eru tit sjónlig millum fólk á tiltøkum. Tit hjálpa, tit skapa tryggleika.
Tit eru til staðar á ítróttartiltøkum, tónleikatiltøkum og øðrum tiltøkum um alt landið. Og vit hoyra javnan í miðlunum, at løgreglan sigur, at samarittarnir hava gjørt stóran mun, tá tiltøk eru.
Og tit gera mun , men uttan at gera mun. Tí tit gera mun, tá tit hjálpa, men tit gera ikki mun á, hvørjum tit hjálpa, - tit hjálpa øllum.
Alt arbeiðið hjá tykkum er sjálvboðið. Tit eru øll ymisk, hava ymiska bakgrund, men tá tit fara í reyða búnan eru tit fyrst og fremst samarittar.
Vaktirnar eru ymiskar, tiltøkini eru ymisk, men samarittarnir eru teir somu – altíð til reiðar at hjálpa.
Góðu samarittar.
Tit gera Føroyar tryggari.
Stóra takk fyri tað, og enn einaferð, hjartaliga til lukku við 25 ára degnum.
Heðin Mortensen, borgarstjóri.