Á hesari síðuni kanst tú finna leinki til skránna, fáa yvirlit yvir ferðsluna og lesa um trygdarviðurskiftini á ólavsøkuni.
Tú sært øll ólavsøkutiltøkini í tiltakskalendaranum Tímin. Har kanst tú eisini sjálv leggja títt tiltak út. Tiltakskalendarin finst bæði á føroyskum og enskum.
Prentaða skráin fæst á kunningarstovuni hjá Visit Tórshavn í Steinatúni og í Snarskivuni á Vaglinum 11 í vanligari upplatingartíð, umframt at hon er borin í handla kring býin. Vilt tú tryggja tær, at tú sært eina dagførda skrá, er tó frægast at brúka Tíman, tí vit gevast at dagføra prentaðu skránna, áðrenn ólavsøkan byrjar.
Sunnudagin 28. juli kl. 13 verður middagssangur á Trappuni í Vágsbotni. Jensina Olsen skipar fyri. Í sangheftinum eru 7 ymiskir sangir. Les meira og tak sangheftið niður á tímin.fo:
Ólavsøkuróðurin verður sunnudagin 28. juli frá klokkan 13 til klokkan 17. Barnaróðurin byrjar klokkan 13, vaksnaróðurin klokkan 15. Atgongumerki til kappróðurin kunnu keypast á alnótini. Les meira og keyp atgongumerkini her:
Les alt um midnáttarsangin og finn sangheftið á tiltakskalendaranum Tímin. Sangheftið fæst eisini í Snarskivuni og í Visit Tórshavn í Steinatúni í vanligari upplatingartíð. Vit býta sanghefti út við ovaru hurðina í býráðssalinum, tá ið midnáttarsangurin er.
Á ólavsøku verður miðbýurin stongdur fyri ferðslu, og tað ber ikki til at koyra oman í Steinatún. Undantøk verða tó gjørd fyri bussleiðina, bygdaleiðir og fyri akfør, ið flyta fólk, ið nýta rullistól, og sum ynskja at verða sett av í Steinatúni.
Fyri at sleppa innum ferðsluforðingarnar í Bøkjarabrekku og Niels Winthers gøtu er tó neyðugt, at serflutningsakfarið er eyðmerkt við skrásetingarnummari og kontaktpersóni áðrenn ólavsøku, soleiðis at vaktarhaldið á staðnum veit, hvørji akfør hava loyvi til at koyra oman í Steinatún.
Serflutningsbussurin hjá Tórshavnar kommunu, sum verður nógv bílagdur til flutning av fólki í rullustóli, er góðkendur frammanundan. Fólk, ið brúka hendan bussin, nýtast tí ikki at gera vart við seg.
Onnur, ið vara av akførum til flutning av fólki í rullistóli, verða biðin um at siga kommununi frá, um tey ynskja at nýta møguleikan at koyra oman í Steinatún á ólavsøku. Tað kanst tú gera við at senda kommununi ein teldupost á torshavn@torshavn.fo við navn og telefonnummari hjá kontaktpersóni. Minst eisini til at upplýsa skrásetingarnummarið á akfarinum.
Legg til merkis, at tað ber eisini til at koyra oman á parkeringsøkið á Skálatrøð á ólavsøku, og eftir kappróðurin er koyrandi til parkeringsøkið á Bursatanga.
Framman fyri H.N. Jacobsens bókahandli eru pláss sett av til fólk í rullistólum undir setanini ólavsøkuaftan og undir skrúðgonguni og kórsanginum ólavsøkudag.
Partar av miðbýnum eru stongdir fyri ferðslu, meðan ólavsøkan er. Ferðsluforðingar verða settar upp av trygdarávum. Í ávísum støðum er vaktarhald, ið kann loyva neyðsynjarakførum, bussleiðini og øðrum frammanundan góðkendum akførum inn. Á kortunum niðanfyri sært tú, hvar og nær ferðsluavmarkingar eru í býnum.
Eins og í fjør ber til at seta bilin frá sær á Skálatrøð. Innkoyringin til Skálatrøð er tó broytt soleiðis, at tú skalt koyra omaneftir Gríms Kambans gøtu og Bøgøtu og snara inn niðanfyri Smiðjuna í Lítluvík fyri at sleppa inn á parkeringsøkið á Skálatrøð. Ein fyribils innkoyring er gjørd við Smiðjuna í Lítluvík.
Bilar, ið fara av Skálatrøð, sleppa bara niðan eftir Sigmundargøtu.
Vilt tú stuðla ítróttarfeløgunum á ólavsøku, skalt tú leita tær oman í gongugøtuna og oman á parkeringplássið í Tórsgøtu, har ítróttarfeløg hava básar við sølu og spæli. Við Betri banka í gongugøtuni standa tjøldini hjá Neistanum og FC Hoyvík, og hinumegin vegin við Býráðssalin stendur tjaldið hjá HB og pylsuvognurin hjá AB.
Á parkeringsplássinum niðast í Tórsgøtu eru tjøldini hjá H71, Havnar badmintonfelag og Ljósinum.
| Mánadag - hósdag | 9 | - | 16 |
| Fríggjadag | 9 | - | 15 |