Vilt tú vera sjálvboðin á eldraøkinum?

At vera sjálvboðin í Heilsu- og umsorganartænastuni kann vera so nógv. Tað er bara hugflogið, sum setur mørkini. Tú kanst til dømis vera vitjanarvinur, gonguvinur, rørsluvinur ella bara vinur.

Heilsu- og umsorganartænastan hevur til dømis eitt tætt samstarv við Vitjanartænastuna hjá Reyða Krossi. Áleið 30 sjálvbodnir vitjanarvinir frá Reyða Krossi vitja javnan eldri borgarar, sum búgva á eldrabústovnum ella í egnum heimi. Tað vil siga, at tað ber til at vera vitjanarvinur hjá Reyða Krossi og sjálvboðin í Heilsu- og umsorganartænastuni samstundis.

Ynskir tú at gerast vitjanarvinur hjá Reyða Krossi, kanst tú seta teg í samband við Vitjanartænastuna hjá Reyðakrossi. Tú finnur kunning og sambandsupplýsingar á heimasíðuni hjá Reyða Krossi.

Ynskir tú at gerast vitjanarvinur í Heilsu- og umsorganartænastuni, kanst tú seta teg í samband við Heilsuhúsið á tel. 30 20 00 ella skriva til heilsuhusid@torshavn.fo.

Vitjanartænastan hjá Reyða Krossi (redcross.fo)

Sum sjálvboðin vænta vit, at tú:

• vísir virðing, gevur nærleika og tryggleika til tann, sum tú vitjar ella ert saman við
• virðir sjálvsavgerðarrættin hjá borgaranum, og at tað, sum tit gera saman, tekur støði í ynskjunum hjá borgaranum, sum tú vitjar
• at tað, tú gert saman við borgaranum, er væl umhugsað, og at tú ikki útsetir borgaran fyri nakað, sum borgarin ikki ynskir ella megnar
• undirskrivar eitt skjal um tagnarskyldu, og at tú virðir tagnarskylduna og ikki fortelur øðrum, hvønn tú vitjar, hvat tú sært og hvat tú upplivir í sambandi við vitjanina
• hevur greiðar avtalur við borgaran, sum tú vitjar, og at avtalurnar verða hildnar
• ikki gert arbeiðið, sum starvsfólk eru sett at gera
• virðir politisku og átrúnaðarligu hugsjónina hjá borgaranum
• ikki tekur ímóti gávum ella pengum frá borgaranum, sum tú vitjar
• ikki er ávirkað av rúsdrekka ella rúsevni, tá tú arbeiðir sum sjálvboðin
• setir teg í samband við kontaktpersónin, um tú hevur ivamál, ella um eitthvørt er, sum tú ynskir at tosa um

Sum sjálvboðin kanst tú vænta tær:

• góða innleiðslu
• ein kontaktpersón
• møguleika at vera saman við øðrum sjálvbodnum
• møguleika at luttaka í undirvísing tvær ferðir um árið, um tú hevur hug til tað

Harafturat vísa kanningar, at tey, sum eru hugbundin í sjálvbodnum arbeiði, hava tvífaldan møguleika fyri góðari sálarligari heilsu. Sjálvboðin eru meira nøgd við lívið samanborin við tey, sum ikki gera sjálvboðið arbeiði. Tíðin og orkan, tú leggur í sjálvboðið arbeiði, kemur tí bæði tær sjálvum og øðrum til góðar.

Sum sjálvboðin fært tú møguleika at knýta nýggj sambond, tú lærir nakað nýtt og tú gert nakað gott fyri onnur. Hetta er alt nakað, sum hevur góða ávirkan á sálarligu heilsuna.

Í 2021 keypti Heilsu- og umsorganartænastan eina súkklu, eina sokallað Rickshaw súkklu, har sjálvboðin kunnu fara súkklutúr við fólkum á eldrabústovni sí viðheftu mynd

Talan er um eina el- súkklu sum er serútgjørd, soleiðis at til ber at klára brekkurnar og føroyska veðurlagið. Búfólkini kunnu bíleggja sær ein súkklutúr. Súkkluvinir eru sjálvbodnir og lærdir upp, so at upplivingin og trygdin er í hásæti. Sjálvboðin viðlíkahalda súkkluna.

Royndirnar  hava verið sera góðar, bæði fyri búfólk og sjálvboðin, og nógvar sólskinssøgur hava verið

Súkklan er staðsett á Tjarnargarði.

Um ein ynskir at gerast súkkluvinur, kann ein seta seg í samband við Heilsuhúsið

Tú kanst lesa meira um at gerast sjálvboðin í faldara okkara, sum tú finnur her: 

Vilt tú vera sjálvboðin - faldari