Oljutangi

Skráset tín oljutanga

Skrásetingarskipanin loyvir tær at skráseta viðurskifti í sambandi við oljutanga. Tú kanst brúka skipanina til at skráseta verandi oljutanga, men eisini ber til at skráseta um oljutangi er tikin úr nýtslu.

Skrásetingin av oljutangum fer fram á hesari síðu: Skráset tín oljutanga

Tá skrásetingin er framd, ber ikki til at gera broytingar í hesari skipan. Ynskir tú at gera broytingar ella at strika skrásetingina, kanst tú seta teg í samband við Tórshavnar kommunu við at senda teldupost til torshavn@torshavn.fo ella við at ringja á tlf. +298 302010

1. Suma inn á røttu adressu á kortinum.

Tú kanst suma inn við at brúka hjólið á músini, ella við at trýsta á plussteknið (+), sum finst á amboðslinjuni á vinstru síðu á kortinum.

Tað ber eisini til at byrja við at leita eftir adressu ella matrikulnr. í leititeiginum, sum liggur ovast til høgru á kortinum.

2. Vel ein av valmøguleikunum, sum lýsir støðuna, ið tú ætlar tær at skráseta.

3. Trýst á staðið á kortinum, har tú vilt skráseta - eitt merki í liti, sum samsvarar við støðuna, ið tú valdi kemur á staðið. Staðsetingin kann vera har oljutangi er ella hevur verið. Hevur eingin oljutangi verið, set so merki mitt á bygningin, sum hitaloysnin umfatar.

4. Teigar koma til sjóndar vinstrumegin kortið. Fyrstu teigarnir snúgva seg um adressu. Hesir teigar verða útfyltir sjálvvirkandi, út frá staðsetingini á kortinum. Vátta at adressan er røtt við at velja “ja”. Er adressan ikki røtt , ella er talan um fleiri adressur, sum eru hitaðar við loysnini, vel so “nei” í teiginum og skriva frágreiðing í teiginum “viðmerking til adressuna”, sum kemur fram, tá tú hevur valt “nei”.

5. Fyll út restina av teigunum. Hesir snúgva seg um byggiár, kontaktupplýsingar og upplýsingar um oljutanga.

6. Attachments (vedhæftninger) – viðfest viðkomandi skjøl

Niðast í breddanum undir heitinum “Attachments  /Vedhæftninger” er møguleiki at viðfesta viðkomandi skjøl t.d. tangaváttan og rokning fyri tanga. 
Soleiðis gert tú:
1.    Trýst á “+  Add/+ Tilføj”
2.    Trýst á “Select file/Vælg fil”
3.    Finn og markera viðkomandi skjal og trýst á “open/åbn”
4.    Trýst á “Add/Tilføj”
5.    Tú kanst leggja fleiri skjøl afturat við at trýsta aftur á “+Add/+Tilføj”

7. Fyri at enda skrásetingina trýstir tú á “Create /opret”. Skrásetingin er nú send og broytingar kunnu ikki gerast í hesari skipan. Ynskir tú at gera broytingar ella at strika skrásetingina, ber til at seta teg í samband við Tórshavnar kommunu við at senda teldupost til torshavn@torshavn.fo ella við at ringja á tlf. +298 302010

Tíðarfreistir

Tíðarfreistirnar fyri útskifting av tanga eru ymiskar, alt eftir um tangin stendur yvir jørð, er niðurgrivin ella um tangin hevur ókent framleiðsluár.

Um tað er óvist nær tangin er frá, verður gingið eftir árstalinum, tá húsini vórðu bygd.

Um húsini eru bygd fram til og við 1950, skal tangin skiftast innan 1. januar 2024.

Um húsini eru bygd í tíðarskeiðinum 1961-1980, skal tangin skiftast innan 1. januar 2025.

Um húsini eru bygd í tíðarskeiðinum 1981-2000, skal tangin skiftast innan 1. januar 2026.

Um húsini eru bygd eftir ár 2000, skal tangin skiftast innan 1. januar 2028.

Leingja freist

Kommunan kann í serligum føri leingja freistina fyri útskifting ella burturbeining av oljutanga. Umsókn skal sendast til Tórshavnar kommunu á torshavn@torshavn.fo.

Freistin kann í serligum førum leingjast:

1. Um ætlan er at skifta til felagshitaskipan
2. Ta tíðina tað tekur at brenna oljuna í tanganum
3. Um bindandi avtala er gjørd um nýggjan oljutanga við veitingartíð
4. Um bindandi avtala er gjørd um nýggja hitaskipan við veitingartíð

Upplýsingar, ið skulu fylgja við umsóknini:

• Eigari, adressa og matrikulnummar
• Avrit av avtalum um at knýta í felagshitaskipan
• Meting um tíðina, tað tekur at brenna oljuna í tanganum
• Avrit av bindandi avtalum við veitingartíðum

Kunngerð nr. 124 frá 11. september 2018 um at fyribyrgja dálking frá oljutangum

Viðgerð av tínum persónupplýsingum

Tórshavnar kommuna tekur dátutrygd og verju av tínum persónupplýsingum í størsta álvara. Ikki einans við at tryggja okkara KT-skipanir, men eisini við, at okkara starvsfólk í dagliga yrki sínum eru kunnað og tilvitað um, hvussu vit handfara persónupplýsingar sambært galdandi lóggávu. Í Tórshavnar kommunu viðgera vit tær persónupplýsingar, sum eru neyðugar fyri at loysa okkara uppgávur.

Tórshavnar kommuna er dátuábyrgdari. Tað er okkara ábyrgd, at tú trygt kanst lata tínar persónupplýsingar til okkum.

Á leinkinum niðast undir “Persónupplýsingarpolitikkur hjá Tórshavnar kommunu” sært tú, hvussu tú samskiftir við okkum, um tú hevur spurningar viðvíkjandi persónupplýsingum, um dátutrygd ella fært illgruna um møgulig trygdarbrot.

Endamál og heimild fyri viðgerð av persónupplýsingum

Umhvørvisdeildin er deild í Tórshavnar kommunu, undir Teknisku fyrisiting. Umhvørvisdeildin viðgerð persónupplýsingar um teg fyri at loysa fyrisitingarligar uppgávur í samband við skráseting av oljutangum í Tórshavnar kommunu, sum álagt teimum í Kunngerð nr. 124 um at fyribyrgja dálking frá oljutangum frá 11. september 2018, § 10.

Soleiðis innsavna vit tínar dátur
Í samband við skráseting av oljutangum innsavnar Umhvørvisdeildin bert tær upplýsingar, ið eru neyðugar fyri endamálið í samband við skráseting av oljutangum. Tá tú skrásetur teg á skrásetingarskipanini letur tú okkum tær persóndátur, vit hava tørv á fyri at røkka hesum endamálinum.

Skráseting
Tær upplýsingar, ið tú letur inn til okkara, verða skrásettar í skipan á Teknisku deild.

So leingi goyma vit tínar upplýsingar
Umhvørvisdeildin innsavnar bert neyðugar persónupplýsingar, og goymir hesar til sakliga endamálið við viðgerðini er rokkið. Upplýsingarnar verða goymdar so leingi tað er neyðugt við atlitið til viðgerðina, tær eru innsavnaðar til.

Um talan er um upplýsingar, sum verða partur av einum málið, verða hesar goymdar í journalskipanini hjá Tórshavnar kommunu og avhendaðar Tjóðskjalasavninum, sambært avhendingaravtalu, og sambært LL um skjalasøvn.

Tíni rættindi
Tú hevur altíð rætt til at vita hvaðani og hvørjar upplýsingar, vit innsavna og skráseta um teg. Metir tú, at onkrar upplýsingar, sum vit hava innsavnað og skrásett, eru skeivar, hevur tú rætt til at fáa hesar rættaðar.

Tú hevur eisini rætt til at fáa upplýsingar strikaðar. Hesin rættur er tó ikki treytaleysur, tá ávísar upplýsingar møguliga ikki mugu strikast grundað á aðra lóggávu, avtalu ella annað endamál, sum gevur Umhvørvisdeildini rætt til at varðveita og viðgera hesar upplýsingar. Ynskir tú at nýta tíni rættindi í sambandi við persónupplýsingar, skalt tú skriva til torshavn@torshavn.fo.

Tú kanst lesa meira um tíni rættindi við at nýta leinkið undir “Persónupplýsingarpolitikkur fyri Tórshavnar kommunu” niðanfyri.

Persónupplýsingarpolitikkur fyri Tórshavnar kommunu

Tú kanst lesa meira um persónupplýsingarpolitikkin hjá Tórshavnar kommunu, og tíni rættindi við at brúka hetta leinkið: Persónsupplýsingarpolitikkur - Tórshavnar kommuna

Vilt tú burturbeina ein niðurgrivnan oljutanga, skal tangin tømast og gravast upp. Vanliga er tað ein VHS-fyritøka ella ein byggifyritøka, sum tekur sær av arbeiðinum.

Sum eigari skalt tú boða kommununi og veitaranum av orkuloysnini frá seinasta lagi 14 dagar áðrenn, tú tekur tangan fyribils ella endaliga úr nýtslu.

Eru tekin um leka ella oljudálking, skal tú boða kommununi frá. Kommunan skal somuleiðis sýna økið, áðrenn tú tippir holið aftur og beinir tangan burtur.

Í serligum førum ber til at søkja kommununa um undantaksloyvi til at lata tangan liggja undir jørð. Fært tú loyvi, skalt tú avrigga tangan. Tað vil siga, at tú ella til dømis IRF skulu botnsúgva tangan, tippa hann og byrgja væl fyri. Vit loyva bara undantøkum, um vit meta tað vera umhvørvisliga ráðiligt og rímiligt.

Vilt tú søkja um undantaksloyvi, skalt tú útfylla umsóknarblaðið um undantaksloyvi niðanfyri og senda tað í telduposti til torshavn@torshavn.fo. Minst til at viðmerkja "Undantaksloyvi til oljutanga" í evnisteigin.

Skal tangin hinvegin gravast upp og beinast burtur, skalt tú boða kommununi frá 14 dagar áðrenn, tú fyllir mold í aftur og beinir tangan burtur.

Umsókn um undantak frá at taka oljutanga upp

TÁ OLJUTANGIN SKAL GRAVAST UPP

• Hevur tú illgruna um oljuleka ella oljudálking, skal tú boða kommununi frá, so kommunan kann sýna tangan og útgrevsturin, áðrenn tú tippir holið aftur og beinir tangan burtur. Send ein teldupost til torshavn@torshavn.fo ella ring á tel. 30 20 10
• Tú frámeldar tangan við at senda ein teldupost til torshavn@torshavn.fo ella ringja á tel. 30 20 10
• Gev gætur at kanna við tínum tryggingarfelagi, hvørt tryggingin tekur við, um dálking vísir seg undir uppgrevstrinum
• Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF

UM OLJUTANGIN IKKI VERÐUR GRIVIN UPP

• Fyri at fáa loyvi til at avrigga tangan í staðin fyri at grava hann upp og beina hann burtur, skalt tú senda kommununi eina umsókn um undantaksloyvi. Í umsóknarskjalinum skal vera frágreiðing og grundgeving fyri, hví tú skalt fáa eitt undantaksloyvi. Tú skalt eisini upplýsa slag av oljutanga og annað
• Fært tú undantaksloyvi, skulu tangi og rørleiðing tømast, og tangin skal botnsúgvast, soleiðis at oljuleivdir ikki eru í tanganum
• Kommunan skal sýna tangan, áðrenn proppur verður settur fyri. Vit kunnu í fyrsta lagi sýna tangan 24 tímar eftir, at tangin er botnreinsaður
• Tá vit hava sýnað tangan, skalt tú fylla tangan við sandi
• Áfyllingartúturin á tanganum skal proppast við einari endamuffu undir jørð og áfyllingarstaðið takast burtur
• Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF
• Tú skalt frámelda tangan við at senda ein teldupost til torshavn@torshavn.fo. Frámeldingin skal annaðhvørt undirskrivast av grundeigaranum ella av viðkomandi, sum hevur ábyrgdina fyri avbyrgingini av tanganum

Ætlar tú tær at taka ein oljutanga úr nýtslu, sum stendur í tínum húsum ella uttan fyri tíni hús, skal tangin frámeldast og burturbeinast. Vanliga er tað ein VHS-fyritøka ella byggifyritøka, sum tekur sær av arbeiðinum.

TÁ TÚ BEINIR TANGAN BURTUR

• Tú skalt boða kommununi frá 14 dagar áðrenn. Tað gert tú við at senda ein teldupost til torshavn@torshavn.fo. Frámeldingin skal undirskrivast av grundeigaranum ella av viðkomandi, sum hevur ábyrgdina av niðurtøkuni
• Tangin skal tømast og reinsast, áðrenn tú beinir hann burtur
• IRF kann botnsúgva tangan móti gjaldi
• Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF
• Tangin skal latast inn á jarnplássinum á brennistøðini á Hjalla

Tú kanst bara seta nýggja oljufýring upp, um tú býrt í einum øki uttan skyldu til at knýta uppí fjarhitaskipanina.

Skriva tín bústað og títt húsanummar í leititeigin á kortinum niðanfyri fyri at síggja møguleikarnar í tínum øki. Er økið blátt, er tín grund er fevnd av íbindingarskyldu til fjarhita. Er økið reytt, er tín matrikkul fevndur av bæði íbindingarskyldu og nýtsluskyldu.

Í summum førum er krav, at tú fært góðkenning frá Tórshavnar kommunu, áðrenn tú setur oljutangan upp. Tangin skal tískil altíð meldast til í seinasta lagi tvær vikur, áðrenn tú setur hann upp. Tú meldar tangan til við at senda ein teldupost til torshavn@torshavn.fo.

Áðrenn tú setur nýggja oljutangan upp, skalt tú minnast til:

FYRI UTTANDURA TANGAR YVIR JØRÐ

• Tangar skulu altíð fráboðast og góðkennast av kommununi
• Allir uttandura tangar skulu vera sniðgóðkendir til uttandura brúk
• Allir tangar uttandura skulu standa í minsta lagi 2,5 metrar frá marki
• Serlig krøv eru til uppseting av uttandura tangum yvir jørð. Tú kanst lesa meira um hesi krøvini í faldaranum hjá Arbeiðs- og brunaeftirlitinum um uppseting av oljutangum

Vegleiðing til uppseting av oljutangum 

FYRI TANGAR INNANDURA

• Tangar, sum eru sniðgóðkendir til innandura nýtslu, skulu bara setast upp inni
• Serlig krøv eru til brunatrygdina. Spyr tín veitara um vegleiðing, og kunna teg nærri í vegleiðingini hjá Arbeiðs- og brunaeftirlitinum um uppsetan av oljutangum
• Frástøðan millum tanga og heitar lutir, tól, oljufýring, skorstein, roykrør og tílíkt skal í minsta lagi vera 50 cm.

Vegleiðing til uppseting av oljutangum 

FYRI UTTANDURA TANGAR AT LEGGJA Í JØRÐ

• Tú skalt boða kommununi frá 14 dagar, áðrenn tangin verður tyrvdur
• Jørðtangar skulu vera sniðgóðkendir til at grava niður. Góðkendir tangar lúka serlig krøv um byggihátt, styrki og verju móti tæring
• Minst til, at oljutangin skal takast uppaftur nøkur ár seinni, tá hann ikki skal brúkast longur. Legg ikki tún, asfalt, flísar, garð og annað omaná
• Ansa eftir, at kloakkrør, káplar ella leiðingar kunnu vera í jørðini
• Byggideildin í Tórshavnar kommunu kann hjálpa tær við at leita fram kloakktekningar og annað. Ring á tel. 30 20 10 ella send ein teldupost til torshavn@torshavn.fo. Skriva "Umbøn um tekningar í samband við oljutanga" í evnisteigin á teldupostinum og minst til at viðmerkja títt navn, telefonnummar og matrikkulnummar

Tá nýggi oljutangin er settur upp, skalt tú senda avrit av tangaváttanini til kommununa. Váttanin skal leggjast við tilmeldingarskjalinum. Váttanin frá veitaranum av tanganum er týdningarmikil, tí hon skjalprógvar slagið av tanga og aldurin á tanganum.

Allir oljutangar skulu harumframt hava merki ella spjaldur, sum vísa framleiðsluár og tangastødd.

Vegleiðing til uppseting av oljutangum

Livitíðin hjá einum oljutanga er tengd at framleiðsluárinum. Tangaváttanin skjalprógvar aldurin og livitíðina hjá tínum tanga, og tí skalt tú minnast til at fáa váttanina útflýggjaða frá tangaveitaranum.

Í talvuni niðanfyri sært tú livitíðina fyri ymsu tangasløgini.

Oljutangar hava vanliga eina livitíð á 20-40 ár; alt eftir slagi. Verður ein niðurgrivin tangi tikin úr nýtslu, skal hann tømast, gravast upp og burturbeinast. Oljutangar yvir jørð skulu tømast og latast inn á jarnplássinum á brennistøðini á Hjalla.

Ivast tú í, um tú hevur skjalprógv fyri tangaslagið og framleiðsluárið á tínum tanga, kanst tú spyrja oljufýrsteknikaran um hetta.

Sum grundeigari hevur tú fulla ábyrgd fyri, at tangin er lógligur, og at hann ikki er í vanda fyri at dálka umhvørvið.

Kanna um tú hevur eina trygging, sum fevnir um dálkingarskaða frá egnum oljutanga.

Les meira um mannagongdir og krøv til oljutangar í okkara kunningar- og vegleiðingartilfari niðanfyri.

Hevur tú spurningar, ert tú vælkomin at venda tær til kommununa. Ring til Snarskivuna tel. 30 20 10 ella send okkum ein teldupost til torshavn@torshavn.fo.

Filmur um oljutangar og oljulekar

Hvussu sleppur tú undan oljuleka og umhvørvisdálking?

Vegleiðing til uppseting av oljutangum