Hevur tú ein gamlan oljutanga, sum er millum 20 og 50 ár, skalt tú vera greið yvir, at tangin er í vanda fyri at dálka bæði mold og vatn. Hendir hetta, kann tað gerast kostnaðarmikið.
Oljutangin skal tí takast úr nýtslu, áðrenn hann gerst ov gamal, soleiðis at bæði tú og kommunan sleppa undan einari kostnaðarmiklari umhvørvisdálking og upprudding. Ivast tú í framleiðsluárinum, eigur tú at fáa ein serfrøðing at kanna tangan og rørleiðingarnar. Um oljunýtslan hækkar munandi, skal kommunan fráboðast og orsøkin finnast.
Tú kanst lesa meira um lógarreglurnar í kunngerðini um fyribyrging av dálking frá oljutangum, sum tú finnur niðanfyri. Harafturat skalt tú fylgja føstum mannagongdum, tá tú tekur tín gamla oljutanga úr nýtslu.
Tú tilmeldar ella frámeldar tín oljutanga við at senda teldupost til torshavn@torshavn.fo.
Ætlar tú tær at keypa nýggjan oljutanga ella oljufýring, skalt tú minnast til, at hetta ber bara til, um tín ogn ikki er fevnd av eini íbindingarskyldu til fjarhita. Tú kanst kanna, um tú býrt á einum matrikkli við íbindingarskyldu til fjarhita við at skriva tín bústað og títt húsanummar í leititeigin niðanfyri.
Hevur tú ikki møguleika fyri at fáa fjarhita, mæla vit til, at tú fært tær eina aðra grøna orkuloysn. Ivast tú í, hvør orkuloysn hóskar best til tíni hús, kanst tú seta teg í samband við Orkuskiftið á Umhvørvisstovuni, sum er ráðgevandi myndugleikin í føroyskum orkuviðurskiftum. Ring á tel. 34 24 00, vitja heimasíðuna www.os.fo ella send ein teldupost til us@us.fo.
Soleiðis burturbeinir tú ein niðurgrivnan oljutanga
Vilt tú burturbeina ein niðurgrivnan oljutanga, skal tangin tømast og gravast upp. Vanliga er tað ein VHS-fyritøka ella ein byggifyritøka, sum tekur sær av arbeiðinum.
Sum eigari skalt tú boða kommununi og veitaranum av orkuloysnini frá seinasta lagi 14 dagar áðrenn, tú tekur tangan fyribils ella endaliga úr nýtslu.
Eru tekin um leka ella oljudálking, skal tú boða kommununi frá. Kommunan skal somuleiðis sýna økið, áðrenn tú tippir holið aftur og beinir tangan burtur.
Í serligum førum ber til at søkja kommununa um undantaksloyvi til at lata tangan liggja undir jørð. Fært tú loyvi, skalt tú avrigga tangan. Tað vil siga, at tú ella til dømis IRF skulu botnsúgva tangan, tippa hann og byrgja væl fyri. Vit loyva bara undantøkum, um vit meta tað vera umhvørvisliga ráðiligt og rímiligt.
Vilt tú søkja um undantaksloyvi, skalt tú útfylla umsóknarblaðið um undantaksloyvi niðanfyri og senda tað í telduposti til torshavn@torshavn.fo. Minst til at viðmerkja "Undantaksloyvi til oljutanga" í evnisteigin.
Skal tangin hinvegin gravast upp og beinast burtur, skalt tú boða kommununi frá 14 dagar áðrenn, tú fyllir mold í aftur og beinir tangan burtur.
Hevur tú illgruna um oljuleka ella oljudálking, skal tú boða kommununi frá, so kommunan kann sýna tangan og útgrevsturin, áðrenn tú tippir holið aftur og beinir tangan burtur. Send ein teldupost til torshavn@torshavn.fo ella ring á tel. 30 20 10
Tú frámeldar tangan við at senda ein teldupost til torshavn@torshavn.fo ella ringja á tel. 30 20 10
Gev gætur at kanna við tínum tryggingarfelagi, hvørt tryggingin tekur við, um dálking vísir seg undir uppgrevstrinum
Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF
UM OLJUTANGIN IKKI VERÐUR GRIVIN UPP
Fyri at fáa loyvi til at avrigga tangan í staðin fyri at grava hann upp og beina hann burtur, skalt tú senda kommununi eina umsókn um undantaksloyvi. Í umsóknarskjalinum skal vera frágreiðing og grundgeving fyri, hví tú skalt fáa eitt undantaksloyvi. Tú skalt eisini upplýsa slag av oljutanga og annað
Fært tú undantaksloyvi, skulu tangi og rørleiðing tømast, og tangin skal botnsúgvast, soleiðis at oljuleivdir ikki eru í tanganum
Kommunan skal sýna tangan, áðrenn proppur verður settur fyri. Vit kunnu í fyrsta lagi sýna tangan 24 tímar eftir, at tangin er botnreinsaður
Tá vit hava sýnað tangan, skalt tú fylla tangan við sandi
Áfyllingartúturin á tanganum skal proppast við einari endamuffu undir jørð og áfyllingarstaðið takast burtur
Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF
Tú skalt frámelda tangan við at senda ein teldupost til torshavn@torshavn.fo. Frámeldingin skal annaðhvørt undirskrivast av grundeigaranum ella av viðkomandi, sum hevur ábyrgdina fyri avbyrgingini av tanganum
Soleiðis burturbeinir tú ein oljutanga yvir jørð
Ætlar tú tær at taka ein oljutanga úr nýtslu, sum stendur í tínum húsum ella uttan fyri tíni hús, skal tangin frámeldast og burturbeinast. Vanliga er tað ein VHS-fyritøka ella byggifyritøka, sum tekur sær av arbeiðinum.
TÁ TÚ BEINIR TANGAN BURTUR
Tú skalt boða kommununi frá 14 dagar áðrenn. Tað gert tú við at senda ein teldupost til torshavn@torshavn.fo. Frámeldingin skal undirskrivast av grundeigaranum ella av viðkomandi, sum hevur ábyrgdina av niðurtøkuni
Tangin skal tømast og reinsast, áðrenn tú beinir hann burtur
IRF kann botnsúgva tangan móti gjaldi
Minst til at olja og vatn, sum inniheldur olju, skal ongantíð leiðast út í vegristir ella spillvatnsfrárensl, men skal latast brennistøðini á Hjalla ella IRF
Tangin skal latast inn á jarnplássinum á brennistøðini á Hjalla
Skalt tú hava nýggjan oljutanga?
Kanna tínar møguleikar
Tú kanst bara seta nýggja oljufýring upp, um tú býrt í einum øki uttan skyldu til at knýta uppí fjarhitaskipanina.
Skriva tín bústað og títt húsanummar í leititeigin á kortinum niðanfyri fyri at síggja møguleikarnar í tínum øki. Er økið blátt, er tín grund er fevnd av íbindingarskyldu til fjarhita. Er økið reytt, er tín matrikkul fevndur av bæði íbindingarskyldu og nýtsluskyldu.
Í summum førum er krav, at tú fært góðkenning frá Tórshavnar kommunu, áðrenn tú setur oljutangan upp. Tangin skal tískil altíð meldast til í seinasta lagi tvær vikur, áðrenn tú setur hann upp. Tú meldar tangan til við at senda ein teldupost til torshavn@torshavn.fo.
Áðrenn tú setur tangan upp
Áðrenn tú setur nýggja oljutangan upp, skalt tú minnast til:
FYRI UTTANDURA TANGAR YVIR JØRÐ
Tangar skulu altíð fráboðast og góðkennast av kommununi
Allir uttandura tangar skulu vera sniðgóðkendir til uttandura brúk
Allir tangar uttandura skulu standa í minsta lagi 2,5 metrar frá marki
Serlig krøv eru til uppseting av uttandura tangum yvir jørð. Tú kanst lesa meira um hesi krøvini í faldaranum hjá Arbeiðs- og brunaeftirlitinum um uppseting av oljutangum
Tangar, sum eru sniðgóðkendir til innandura nýtslu, skulu bara setast upp inni
Serlig krøv eru til brunatrygdina. Spyr tín veitara um vegleiðing, og kunna teg nærri í vegleiðingini hjá Arbeiðs- og brunaeftirlitinum um uppsetan av oljutangum
Frástøðan millum tanga og heitar lutir, tól, oljufýring, skorstein, roykrør og tílíkt skal í minsta lagi vera 50 cm.
Tú skalt boða kommununi frá 14 dagar, áðrenn tangin verður tyrvdur
Jørðtangar skulu vera sniðgóðkendir til at grava niður. Góðkendir tangar lúka serlig krøv um byggihátt, styrki og verju móti tæring
Minst til, at oljutangin skal takast uppaftur nøkur ár seinni, tá hann ikki skal brúkast longur. Legg ikki tún, asfalt, flísar, garð og annað omaná
Ansa eftir, at kloakkrør, káplar ella leiðingar kunnu vera í jørðini
Byggideildin í Tórshavnar kommunu kann hjálpa tær við at leita fram kloakktekningar og annað. Ring á tel. 30 20 10 ella send ein teldupost til torshavn@torshavn.fo. Skriva "Umbøn um tekningar í samband við oljutanga" í evnisteigin á teldupostinum og minst til at viðmerkja títt navn, telefonnummar og matrikkulnummar
Tá nýggi oljutangin er settur upp, skalt tú senda avrit av tangaváttanini til kommununa. Váttanin skal leggjast við tilmeldingarskjalinum. Váttanin frá veitaranum av tanganum er týdningarmikil, tí hon skjalprógvar slagið av tanga og aldurin á tanganum.
Allir oljutangar skulu harumframt hava merki ella spjaldur, sum vísa framleiðsluár og tangastødd.
Livitíðin hjá einum oljutanga er tengd at framleiðsluárinum. Tangaváttanin skjalprógvar aldurin og livitíðina hjá tínum tanga, og tí skalt tú minnast til at fáa váttanina útflýggjaða frá tangaveitaranum.
Í talvuni niðanfyri sært tú livitíðina fyri ymsu tangasløgini.
Oljutangar hava vanliga eina livitíð á 20-40 ár; alt eftir slagi. Verður ein niðurgrivin tangi tikin úr nýtslu, skal hann tømast, gravast upp og burturbeinast. Oljutangar yvir jørð skulu tømast og latast inn á jarnplássinum á brennistøðini á Hjalla.
Ivast tú í, um tú hevur skjalprógv fyri tangaslagið og framleiðsluárið á tínum tanga, kanst tú spyrja oljufýrsteknikaran um hetta.
Sum grundeigari hevur tú fulla ábyrgd fyri, at tangin er lógligur, og at hann ikki er í vanda fyri at dálka umhvørvið.
Kanna um tú hevur eina trygging, sum fevnir um dálkingarskaða frá egnum oljutanga.
Les meira um mannagongdir og krøv til oljutangar í okkara kunningar- og vegleiðingartilfari niðanfyri.
Hevur tú spurningar, ert tú vælkomin at venda tær til kommununa. Ring til Snarskivuna tel. 30 20 10 ella send okkum ein teldupost til torshavn@torshavn.fo.
