Arbeiðsuppgávan

Sum mentor kanst tú fáa ein týdningarmiklan leiklut í lívinum hjá einum barni. Tú ert ein álítandi og støðugur persónur, og ert við til at hjálpa barninum at trívast og mennast.

Uppgávan sum mentor kann vera ymisk, alt eftir aldrinum á barninum og alt eftir, hvørjar avbjóðingar barnið og familjan hevur. Uppgávan kann taka ca. 5-10 tímar um vikuna. Onkuntíð eitt sindur meiri. Arbeiðstíðirnar eru tengdar at uppgávuni og kunnu vera um morgunin ella seinnapartin og út á kvøldið. Í summum førum liggja tímarnir í vikuskiftinum. Mentor ger avtalu við sosialráðgevan um arbeiðstíðina.

Saman við mentor kunnu børnini fáa upplivingar, sum tey annars ikki eiga lut í. Børnini kunnu vera frá 0-18 ár og í summum førum upp í 23 ár.

Tá talan er um smærri børn, kann tað vera, at tú til dømis skalt heinta barnið á dagstovninum ella í frítíðarskúlanum, spæla við tað, lesa søgur, fara ein túr á spæliplássið, svimja og líknandi, sum hóskar seg til minni børn.

Er talan um eitt sindur eldri børn ella ung, kann tað vera, at tú fert til frítíðarítriv við barninum, tit ganga túrar, fara til fitness, svimja, fara í biograf ella koyra biltúr. Barnið skal hava ein vaksnan at tosa við um ivamál, avbjóðingar og tað sum annars upptekur barnið.

At vera mentor krevur nógv persónliga. Hinvegin er tað ómetaliga gevandi at vera mentor, og tú lærir nógv nýtt um teg sjálva. Mentorar kunna vera við til at geva einum barni ein týðandi førning, sum tað kann bera víðari í sínum vaksna lívi.

Ein ætlan verður løgd

Tá tú verður sett í starv sum mentor, fært tú innlit í, hvørjar avbjóðingar eru kring barnið, og hvat ætlanin er, at tú skalt hjálpa barninum við. Kunningina fært tú frá sosialráðgevanum á Barnaverndartænastuni. Tú kanst altíð sparra við sosialráðgevan um uppgávuna, um tú ivast.

Ein uppgáva kann vera at hjálpa barninum at menna sínar sosialu førleikar. Barnið gongur kanska til okkurt frítíðarítriv, men følir seg ofta uttanfyri, tí tað kennir ikki óskrivaðu sosialu reglurnar. Tín uppgáva kundi tá verið at eygleitt og tosa við barnið um, hvussu tað skal uppføra seg meira hóskandi til gagns fyri barnið sjálvt. Barnið fær soleiðis meira sjálvsálit og fer at trívast betri.

Uppgávan kann eisini vera at hjálpa einum barni, ið ofta endar í ósemjum. Barnið hevur kanska torført við at greiða frá sínum kenslum og tørvi á ein gagnligan hátt. Barnið kemur tí ofta út í ósemjur við onnur børn. Mentor hevur tá til uppgávu at læra barnið at loysa ósemjur og at hava fokus á at menna samskiftisførleikarnar hjá barninum.

Í øðrum førum kann uppgávan eisini bara vera at vera nærverandi og geva barninum nakrar jaligar upplivingar.

Sosialráðgevin skal framhaldandi fylgja øllum fyriskipanum upp. Í hesum sambandi verður tú biðin um at koma við einari afturboðan um, hvussu tú heldur, tað gongur hjá barninum. Tú kanst eisini rokna við at skula luttaka á netverksfundi, har tey, sum vara av barninum, hittast fyri at meta um, hvørt vit eru á rættari leið, ella um onkur broyting eigur at verða gjørd. 

Tú ert ikki einsamøll

Sum mentor hjá einum barni, ert tú ikki einsamøll við uppgávuni. Tú kanst altíð sparra um uppgávuna við sosialráðgevan í Barnaverndartænastuni. 

Tað er gevandi at vera mentor hjá einum barni. Tú kanst koma til at hava stóra ávirkan á lívsleiðina hjá barninum, tú fært møguleika at vaksa og mennast sum menniskja, og tú fert at merkja gleðina við at gera stóran mun.

Út yvir at tú hjálpir barninum, lærir tú nógv um samskifti, empati og at loysa ósemjur.

Tað kann tó sjálvandi eisini vera avbjóðandi at vera mentor. Eitt nú kann tað vera kensluliga avbjóðandi at koma tætt inn at lívinum og familjuni hjá einum barni.

Førleikar og eginleikar hjá mentor

Ein mentor er ein tolin og jaligur persónur. Ein mentor dugir at vísa empati, dámar at arbeiða við menniskjum og dámar væl at gera mun. At duga væl at lurta er ein stórur fyrimunur. Mentor skal harafturat hava fokus á møguleikar og loysnir, og sum mentor mást tú duga at seta mørk.

Tað er ikki eitt krav, at tú hevur eina útbúgving, men tað kann í summum førum vera ein fyrimunur.

Barnaverndartænastan innheintar barnaváttan hjá øllum mentorum.

Allir mentorar hava tagnar- og fráboðanarskyldu. Kunnað verður nærri um hetta undir setanini.

Mentorar eru tímaløntir sambært pedagogsáttmálanum. Innplaseringin er í mun til útbúgving og royndir. Setanin kann vera í styttri ella longri tíðarskeið.