Ferðslutrygd

Tórshavnar kommuna leggur nógva orku í at gera ferðsluna trygga. Hetta gera vit í samráð við Løgregluna, Landsverk og Ráðið fyri Ferðslutrygd.

Økta talið av bilum í ferðsluni er ein avbjóðing fyri ferðslutrygdina, og vit royna tískil framhaldandi at menna ferðsluviðurskiftini og bøta vegir, soleiðis at tað er trygt hjá bilførarum, súkklarum og gongufólki at ferðast í kommununi.

Borgarar heita dagliga á kommununa, sum er vegamyndugleiki, um at betra um ferðslutrygdina á vegum, gongubreytum, súkklubreytum, gonguteigum og við vegamót, har sýnið er vánaligt.

Ferðslutrygdin hevur hægstu raðfesting, tá vit gera nýggjar vegir og dagføra vegir. Niðanfyri sært tú, hvørji átøk fyri størri ferðslutrygd, Tekniska deild raðfestir.